საინტერესო შესაძლებლობა ქართული მცირე და საშუალო საწარმოებისთვის. გაეროს განვითარების პროგრამა აცხადებს კონკურსს კომპანიებისთვის საწარმოო პროცესში მდგრადი მოხმარებისა და წარმოების (SCP) პრაქტიკის დასანერგად. ინიციატივა დაეხმარება ბიზნესებს რესურსების ოპტიმიზაციაში, გარემოზე ზემოქმედების შემცირებასა და საექსპორტო ბაზრებზე მათი კონკურენტუნარიანობის გაძლიერებაში.

საგრანტო კონკურსი ხორციელდება ევროკავშირის ფინანსური მხარდაჭერით, გაეროს განვითარების პროგრამის პროექტის „წვდომა საექსპორტო ბაზრებზე“ ფარგლებში.

განაცხადის წარდგენის ბოლო ვადა: 2026 წლის 23 მარტი

დეტალური ინფორმაცია იხილეთ ბმულზე.

საგრანტო პროგრამის დეტალები
ბრიტანულ-ქართული აკადემია აცხადებს კონკურსს მე-7, მე-8, მე-9 და მე-10 კლასების მაღალი აკადემიური მოსწრების მქონე აქტიური და მოტივირებული მოსწავლეებისათვის, რომლებსაც სურთ 2025-26 სასწავლო წლიდან შემოუერთდნენ ბრიტანულ-ქართული აკადემიის სასკოლო საზოგადოებას და სწავლა გააგრძელონ საერთაშორისო პროგრამებზე: კემბრიჯის საერთაშორისო პროგრამაზე მე-8, მე-9 და მე-10 კლასებში და საეთაშორისო ბაკალავრიატის (IB) პროგრამაზე მე-11-მე-12 კლასებში. 

ბრიტანულ-ქართული აკადემიის საერთაშორისო პროგრამების შესახებ დამატებითი ინფორმაცია შეგიძლიათ მიიღოთ ბმულზე.

ბრიტანულ-ქართული აკადემიის გრანტის სრული მოცულობა შეადგენს ორას ორმოცდაათიათას დოლარს (250 000$) და გადანაწილდება კონკურსში გამარჯვებულ თითოეულ მოსწავლეზე სწავლის გადასახადის დასაფინანსებლად. საგრანტო კონკურსის ფინალისტები მიიღებენ 30%-დან 100% მდე ოდენობის გრანტს.

საგრანტო კონკურსში მონაწილეობის მიღება შეუძლია ნებისმიერ მსურველს, გარდა ბრიტანულ-ქართული აკადემიის მოსწავლეებისა. 

საგრანტო კონკურსში მონაწილეობის პირობები
საგრანტო კონკურსში მონაწილეობა შეუძლია ნესბისმიერ მოსწავლეს, რომელიც 2025-26 სასწავლო წელს იქნება მერვე, მეცხრე, მეათე და მეთერთმეტე კლასში და რომელსაც აქვს მაღალი აკადემიური მოსწრება და მოტივაცია ჩაერთოს ბრიტანულ-ქართული აკადემიის მრავალფეროვანი გამოწვევებით სავსე სასკოლო ცხოვრებაში. 

სასწავლო გრანტი განკუთვნილია აკადემიაში სწავლის მთელ პერიოდზე და ყოველწლიურად განახლდება მოსწავლის აკადემური მოსწრების, პოზიტიური ქცევისა და სასკოლო პროექტებში ჩართულობის საფუძველზე. 

საგრანტო კონკურსში მონაწილეობის მიღება შეუძლია ნებისმიერ მსურველს, გარდა ბრიტანულ-ქართული აკადემიის მოსწავლეებისა.

მიღების პროცესი
მოსწავლეებმა, რომლებიც დაინტერესებულნი არიან ბრიტანულ-ქართული აკადემიის საერთაშორისო პროგრამებზე სასწავლო გრანტის მოპოვებით, უნდა გაიარონ შემდგომი ეტაპები:

სააპლიკაციო ფორმის შევსება – https://forms.gle/TaUVTeq1GoLrB9xP7
არაუგვიანეს 31 მარტის, 18:00 საათისა მოსწავლეებმა უნდა შეავსონ სააპლიკაციო ფორმა, თან დაურთონ სამოტივაციო წერილი (200-დან 400 სიტყვამდე) ინგლისურ ენაზე.

ტესტირება  სკოლის კამპუსზე
სააპლიკაციო ფორმების განხილვის შემდეგ, შერჩეულ მოსწავლეებს გაეგზავნებათ ტესტირების განრიგი. მოსწავლემ თან უნდა იქონიოს 2023-24 და 2024-25 (I სემესტრის) სასწავლო წლების ნიშნების ფურცელი.
ტესტირება ჩატარდება სკოლის კამპუსზე შემდეგ საგნებში:

ქართული ენა და ლიტერატურა;
მათემატიკა;
ინგლისური;
CHAT4.
გასაუბრება

ტესტირების შედეგებზე დაყრდნობით შერჩეულ მოსწავლეებს მოვიწვევთ გასაუბრებაზე აკადემიურ დირექტორთან, შესაბამისი პროგრამის კოორდინატორთან და მოსწავლეთა მიღების დირექტორთან. 

გისურვებთ წარმატებას!

ინოვაციებისა და ტექნოლოგიების სააგენტო 2026 წლის იანვრიდან იწყებს „ინოვაციური სტარტაპების აქსელერაციის პროგრამას". პროგრამის მიზანია საქართველოს სტარტაპ ეკოსისტემის გაძლიერება, ინოვაციური და ტექნოლოგიური ბიზნეს იდეების განვითარება, მათი საინვესტიციო მიმზიდველობის ზრდა და გლობალურ ბაზარზე გასვლის ხელშეწყობა.

პროგრამის ფარგლებში გამარჯვებული საერთაშორისო აქსელერატორები - Plug&Play, Startupbootcamp, 500 Global და Founder Institute - განახორციელებენ ერთწლიან აქსელერაციის პროგრამას. პროგრამა დაეხმარება განვითარების ადრეულ ეტაპზე მყოფ ინოვაციურ სტარტაპებს იდეების ვალიდაციაში, მასშტაბირებადი ბიზნეს მოდელის ჩამოყალიბებაში, ზრდის უზრუნველყოფასა და ინვესტიციების მოზიდვაში.

აქსელერაციის ერთწლიანი სრული ციკლი მოიცავს სამ ფაზას:

I ფაზა - 2-თვიანი ინტენსიური სწავლებისა და მენტორინგის პერიოდი შერჩეული სტარტაპებისთვის.

II ფაზა - 4-თვიანი პერიოდი, რომელიც ფოკუსირებულია მინიმალური სიცოცხლისუნარიანი პროდუქტის (MVP) შექმნასა და დახვეწაზე, პროდუქტის ბაზრის მოთხოვნებთან შესაბამისობის უზრუნველყოფასა და კონკურენტუნარიანობის გაზრდაზე. ამ ეტაპზე სტარტაპები იღებენ ინტენსიურ სწავლებასა და მენტორინგს. თითოეული სტარტაპი სააგენტოსგან მიიღებს 50,000 ლარის ოდენობის გრანტს.

III ფაზა - 6-თვიანი პერიოდი, რომლის განმავლობაში სტარტაპები იღებენ ინდივიდუალურად მორგებულ მხარდაჭერას. ეს მოიცავს გაყიდვების სტრატეგიის შემუშავებას, გლობალურ და რეგიონულ ბაზრებზე გასვლის ხელშეწყობას, მომხმარებელთა ბაზის გაზრდასა და შემოსავლების გენერირების ოპტიმიზაციას. თითოეული სტარტაპი სააგენტოსგან მიიღებს 150,000 ლარის ოდენობის გრანტს.

პროგრამა სრულდა დაფინანსებულია საქართველოს ინოვაციებისა და ტექნოლოგიების სააგენტოს მიერ.

2026 წლის იანვრიდან აქსელერაციის პროცესს დაიწყებს Plug&Play და Startupbootcamp, ხოლო ივლისიდან პროგრამას შეუერთდებიან 500 Global და Founder Institute.

Startupbootcamp - ევროპის ერთ-ერთი უდიდესი სტარტაპების აქსელერატორი 2010 წელს დაარსდა დანიაში. კომპანია გლობალურ ბაზარზე საქმიანობს და 27 ქვეყანაში აქვს წარმომადგენლობა. 2010 წლიდან დღემდე Startupbootcamp-მა განახორციელა 180-ზე მეტი სპეციალიზებული აქსელერაციის პროგრამა, რომელშიც ჩართული იყო 1800-ზე მეტი სტარტაპი. პორტფოლიო სტარტაპებს აქვს 3.5 მილიარდ აშშ დოლარის ოდენობით მოზიდული ინვესტიციები. კომპანიას ჰყავს 100-ზე მეტი წარმატებით „დაექსითებული“ სტარტაპი.

Plug&Play - მსოფლიოს ერთ-ერთი მსხვილი სტარტაპების აქსელერატორი 2006 წელს დაფუძნდა აშშ-ში, დღეს წარმოდგენილია 50-ზე მეტ ქალაქში და ახორციელებს აქსელერაციის 60-ზე მეტ პროგრამას მთელი მსოფლიოს მასშტაბით. მატი პორტფოლიო აერთიანებს 2,500-ზე მეტ სტარტაპს, რომლებმაც მოიზიდეს 12 მილიარდ აშშ დოლარზე მეტი დაფინანსება.

Startupbootcamp აქსელერატორზე დეტალური ინფორმაციისთვის ეწვიეთ ბმულს: https://www.startupbootcamp.org/georgia განაცხადის გასაკეთებლად ეწვიეთ ბმულს: https://tally.so/r/waWrDy

კითხვების შემთხვევაში შეგიძლიათ მიმართოთ Startupbootcamp-ს მეილზე - [email protected]

Plug&Play აქსელერატორზე დეტალური ინფორმაციისთვის და განაცხადის გასაკეთებლად ეწვიეთ ბმულს: https://shorturl.at/mkohh

გისურვებთ წარმატებებს!

საქართველოს ინოვაციების და ტექნოლოგიების სააგენტო აცხადებს საგრანტო კონკურსს "ინოვაციების გრანტები რეგიონებისთვის " 

მიმდინარე საგრანტო კონკურსით ფინანსდება პროექტები იმერეთის რეგიონიდან.

პროგრამის მიზანია ხელი შეუწყოს საქართველოს რეგიონებში

• ადგილობრივი ინოვაციური და ტექნოლოგიური  ეკოსისტემის  გაძლიერებას;  

• ინოვაციური პროდუქტების, მომსახურების, ტექნოლოგიებისა და პროცესების შემუშავება-ათვისებისა და კომერციალიზაციის გზით ინოვაციური და ტექნოლოგიური სტარტაპების შექმნას;

საგრანტო განაცხადი ფასდება შემდეგი კრიტერიუმებით: 

ა)  დამფუძნებლების კომპეტენციები; 

ბ) ინოვაციური პროდუქტი/სერვისი;

გ) სამიზნე ბაზარი/კონკურენტული უპირატესობა;

დ) რეგიონის განვითარება და მასშტაბირების პოტენციალი;

აღნიშნული პროგრამა თქვენთვისაა: 

თუ მუშაობთ ინოვაციურ მოწყობილობასა ან/და პროგრამაზე, ხართ იმერეთის რეგიონში რეგისტრირებული მეწარმე სუბიექტი ან აპირებთ დარეგისტრირებას აღნიშნულ რეგიონში.  

ფიზიკური პირის საგრანტო განაცხადის გამარჯვების შემთხვევაში, მის მიერ მეწარმე სუბიექტის რეგისტრაცია სავალდებულოა საგრანტო ხელშეკრულების გაფორმებამდე. 

გრანტის მიმღები არ არის უფლებამოსილი საგრანტო ხელშეკრულების დადებიდან 3 წლის განმავლობაში რეგისტრირებული ადგილსამყოფელი/იურიდიული მისამართი გადაიტანოს სხვა რეგიონში. 

ნებისმიერი კითხვის არსებობის შემთხვევაში, დაგვიკავშირდით [email protected]

განაცხადების მიღება მცირე საინვესტიციო მხარდაჭერისთვის

"გაეროს სურსათისა და სოფლის მეურნეობის ორგანიზაცია" (FAO) საქართველოში მოხარულია გაცნობოთ, რომ მცირე საინვესტიციო მხარდაჭერის სქემის განაცხადების მიღება ავსტრიის საერთაშორისო პარტნიორობის მიერ დაფინანსებული პროექტის "ინკლუზიური სოფლის განვითარება და მდგრადი სოფლის მეურნეობა" ფარგლებში, რომელიც საქართველოს გარემოს დაცვისა და სოფლის მეურნეობის სამინისტროსა და რეგიონული განვითარების სამინისტროსთან თანამშრომლობით ხორციელდება. ინიციატივის მიზანია სოფლის მეურნეობის სექტორში კონკურენტუნარიანობის ზრდა, სურსათის წარმოების გაუმჯობესება და, ამავდროულად, სოფლად სიღარიბის დაძლევა, განსაკუთრებული აქცენტით უთანასწორობის შემცირებაზე.

მცირე საინვესტიციო მხარდაჭერის სქემაში მონაწილეობა პოტენციურ ბენეფიციარებს დაეხმარება მიმდინარე სასოფლო-სამეურნეო წარმოებისა თუ სხვა სოციალურ-ეკონომიკური საქმიანობის გაუმჯობესებაში, ან მისცემს მათ ახალ ეკონომიკურ აქტივობებში ჩართვის შესაძლებლობას. საინვესტიციო მხარდაჭერა ხორციელდება თანამონაწილეობრივი გრანტის მოდელით და მიზნად ისახავს ბენეფიციარების წახალისებას გაუმჯობესებული ტექნოლოგიების დანერგვაში, გრძელვადიანი საინვესტიციო გეგმების შემუშავებასა და, საბოლოოდ, მდგრადი ეკონომიკური მედეგობის ხელშეწყობაში.

ვის შეუძლია განაცხადის შემოტანა

გრანტის ბენეფიციარები შესაძლოა იყვნენ როგორც ფიზიკური პირები - ფერმერები და ბიზნეს მეწარმეები, ასევე ორგანიზაციები, მათ შორის მოგებაზე ორიენტირებული და არაკომერციული პირები, კოოპერატივები, ასოციაციები, ბიზნეს კომპანიები, ფერმერთა/მწარმოებელთა ჯგუფები.

სამიზნე სფეროები

სოფლის მეურნეობა: ბოსტნეული და მარცვლეული კულტურები, ხილი და კენკრა, რძის პროდუქტები, მეფრინველეობა, მეფუტკრეობა და მეღვინეობა.

ტურიზმი: აგროტურიზმი, გასტროტურიზმი, ტურისტული მიზიდულობის არეალების განვითარება.

საინვესტიციო მხარდაჭერის სქემა მოიცავს შემდეგი აქტივების შესყიდვას:

** მანქანა-დანადგარები და აღჭურვილობა პირველადი სასოფლო-სამეურნეო წარმოებისთვის;
** დანადგარები გადამამუშავებელი წარმოებისა და დამატებითი ღირებულების შექმნის უზრუნველსაყოფად;
** შესაფუთი და მარკირების მანქანა-დანადგარები და ხელსაწყოები.

სამიზნე მუნიციპალიტეტები: კასპი და მარტვილი.

შერჩევის ზოგადი კრიტერიუმები:

** აპლიკანტი უნდა იყოს საქართველოს მოქალაქე;
** უნდა ცხოვრობდეს და/ან ეწეოდეს საქმიანობას ერთ-ერთ სამიზნე მუნიციპალიტეტში;
** ჰქონდეს შესაბამისი გამოცდილება შერჩეულ საინვესტიციო სფეროში;
** ინვესტიციისთვის საჭირო შესაბამისი რესურსები უნდა იყოს უზრუნველყოფილი, როგორც ეს მითითებულია შერჩევის სპეციფიკურ კრიტერიუმებში;
** შეეძლოს ფინანსური ან არაფულადი თანამონაწილეობის გაღება, გრანტის კატეგორიების მიხედვით განსაზღვრული წესით;
** საინვესტიციო სქემაში მონაწილე ორგანიზაცია უნდა იყოს რეგისტრირებული სუბიექტი.

განაცხადის შემოსატანად ჩამოტვირთეთ გრანტების საოპერაციო სახელმძღვანელო (GOM) შერჩევის კრიტერიუმებისა და განაცხადების მიღების სხვა დეტალების შესახებ დამატებითი ინფორმაციისთვის. ასევე, იხილეთ განაცხადის ფორმა და ბიზნეს გეგმის შაბლონი (.Zip ფაილი).

საგრანტო კატეგორიები:

მცირე გრანტი: 1, 000-10, 000 აშშ დოლარი
საშუალო გრანტი: 10, 000-20, 000 აშშ დოლარი

თანამონაწილეობის მოთხოვნები

შერჩეულმა ბენეფიციარებმა უნდა უზრუნველყონ პროექტის მთლიანი ღირებულების 30 პროცენტიანი ფინანსური თანამონაწილეობა, გარდა ქალებისა, ახალგაზრდებისა და მოწყვლადი ჯგუფებისა, რომელთაც შეუძლიათ 15 პროცენტიანი თანამონაწილეობის გაღება. მოწყვლადი ჯგუფების წარმომადგენლებს უფლება აქვთ უზრუნველყონ არაფულადი თანამონაწილეობაც.

განაცხადების წარდგენა და ვადები

სრულყოფილად შევსებული სააპლიკაციო ფორმა (მცირე გრანტებისთვის) ან ბიზნეს გეგმა (საშუალო გრანტებისთვის) ყველა თანდართულ დოკუმენტთან ერთად, როგორც ეს მითითებულია სააპლიკაციო ფორმაში, უნდა გაიგზავნოს ინგლისურ ან ქართულ ენაზე 2026 წლის 25 თებერვლამდე შემდეგ ელ. ფოსტის მისამართზე: [email protected].

სააპლიკაციო ფორმა და ბიზნეს გეგმა უნდა მოიცავდეს ინფორმაციას ბიუჯეტის, საჭირო აღჭურვილობის ტექნიკური მახასიათებლებისა და მომწოდებლის შესახებ. გრანტის მიმღებმა თავად უნდა მოახდინოს მომწოდებლის იდენტიფიცირება და მასთან წინასწარი შეთანხმება აღჭურვილობის შესყიდვის პირობებზე. FAO გადაამოწმებს განაცხადის ფორმაში მითითებულ ფასებს და მოკვლევის საფუძველზე შესაძლოა მოითხოვოს მომწოდებლის შეცვლა.

შერჩევის შემთხვევაში, საგრანტო ხელშეკრულების გაფორმების შემდეგ, გრანტის მიმღებმა მომწოდებელს უნდა გადაუხადოს თანამონაწილეობრივი საგრანტო კომპონენტის ფარგლებში განსაზღვრული თავისი წილი. მას შემდეგ, რაც მოხდება აღჭურვილობის ეფექტური მიწოდება და მონტაჟი, FAO პირდაპირ მომწოდებელთან დაფარავს დარჩენილ გადასახადს.

არაფულადი თანამონაწილეობის შემთხვევაში, რომლითაც სარგებლობა გრანტების საოპერაციო სახელმძღვანელოს (GOM) თანახმად, შეუძლიათ მხოლოდ მოწყვლადი ჯგუფების წარმომადგენლებს 10, 000 აშშ დოლარამდე მცირე გრანტის შემთხვევაში, გრანტის 50 პროცენტის წინასწარი გადახდა მომწოდებელთან მოხდება გრანტის მიმღების მიერ არაფულადი წვლილის დადასტურების შემდეგ (გრანტის გაცემამდე გადამოწმების გზით). აღჭურვილობის მიწოდებისა და მონტაჟის შემდეგ, FAO მომწოდებელს გადაუხდის დარჩენილ თანხას.

საკონტაქტო ინფორმაცია:

განაცხადების მიღების შესახებ დამატებითი ინფორმაციისთვის, ასევე განაცხადების წარდგენასთან დაკავშირებით კონსულტაციისთვის, გთხოვთ, დაუკავშირდეთ FAO-ს ადგილობრივ მუნიციპალურ კოორდინატორებს:

მარტვილის მუნიციპალიტეტი: ეკატერინე ნაროუშვილი - ტელ: 595 183663; ელ-ფოსტა: [email protected]

კასპის მუნიციპალიტეტი: ლევან მუმლაძე - ტელ: 577 080500, ელ-ფოსტა: [email protected]

საჩივრის წარდგენის მექანიზმი

ამ სქემის განხორციელების მიზნით, გაეროს სურსათისა და სოფლის მეურნეობის ორგანიზაციამ (FAO) შეიმუშავა საჩივრების წარდგენის მექანიზმი (GRM). აღნიშნული მექანიზმი საქართველოში FAO-ს პროგრამების ბენეფიციარებსა და დაინტერესებულ მხარეებს სთავაზობს გამჭვირვალე, ეფექტიან და ოპერატიულ პროცესს საკუთარი მოსაზრებების დასაფიქსირებლად, პრობლემების გადასაჭრელად და უკუკავშირის მისაღებად. საჩივრის წარდგენა შესაძლებელია ელექტრონული ფოსტის მეშვეობით: [email protected]. საჩივარი უნდა შეიცავდეს ისეთ დეტალებს, როგორიცაა თარიღი, ადგილი, აღწერა და სხვა შესაბამისი ინფორმაცია.

თუ ცხოვრობთ მაღალმთიან რეგიონებში და გსურთ სასოფლო-სამეურნეო ტექინიკის შეძენა, პროგრამის ფარგლებში შესაძლებლობა გაქვთ მიიღოთ თანადაფინანსება.

პროგრამის მიზანი და ამოცანა

„მაღალმთიან დასახლებებში სასოფლო-სამეურნეო ტექნიკის თანადაფინანსების პროგრამის“ მიზანია მაღალმთიან დასახლებებში სასოფლო-სამეურნეო ტექნიკაზე ხელმისაწვდომობის გაზრდა.

პროგრამის ამოცანას წარმოადგენს სასოფლო-სამეურნეო ტექნიკის შესასყიდად საჭირო ფინანსებზე ხელმისაწვდომობის გაზრდა თანადაფინანსების გზით.

პროგრამის განმახორციელებელი

პროგრამის განმახორციელებელია სოფლის განვითარების სააგენტო.

პროგრამის განხორციელებას კოორდინაციას უწევს საქართველოს გარემოს დაცვისა და სოფლის მეურნეობის სამინისტრო.

პროგრამის გავრცელების გეოგრაფიული არეალი

პროგრამა განხორციელდება საქართველოს მაღალმთიან დასახლებებში (მაღალმთიანი დასახლებები განისაზღრება საქართველოს მთავრობის 2015 წლის 30 დეკემბრის №671 დადგენილებით „მაღალმთიან დასახლებათა ნუსხის დამტკიცების შესახებ“. დაგენილებაში შესაძლოა განხორციელდეს ცვლილება, რომლის გადამოწმებაც შესაძლებელია საქართველოს საკანონმდებლო მაცნეს ვებგვერდზე).

თუ ხართ აქტიური მეწარმე და ფიქრობთ, რომ თქვენი ბიზნესის უკეთ სამართავად მარკეტინგული მომსახურებები გჭირდებათ, მაშინ ეს შესაძლებლობა დაგაინტერესებთ:

სააგენტო “აწარმოე საქართველოში”, მსოფლიო ბანკის მხარდაჭერით, იწყებს ახალ პროექტს მარკეტინგისა და გაყიდვების მიმართულებით, რომელიც მცირე და საშუალო საწარმოებს, სააგენტოს მიერ შერჩეული მარკეტინგული კომპანიებისგან მომსახურების მისაღებად, 10 000 ლარამდე თანადაფინანსებას სთავაზობს.

პროექტში ჩართვისათვის უნდა მიმართოთ სააგენტოს „აწარმოე საქართველოში“ რეგიონულ საკონსულტაციო ცენტრს, სადაც თქვენ:

• გაივლით სიღრმისეულ ბიზნეს-დიაგნოსტიკას და დაადგენთ თქვენი ბიზნესის საჭიროებებს
• შეარჩევთ შესაბამის საკონსულტაციო მომსახურებას
• მომსახურებით სარგებლობისთვის მიიღებთ 90%-მდე თანადაფინანსებას

თუ დიაგნოსტიკის შედეგად თქვენს საწარმოს მარკეტინგული მომსახურებების საჭიროება დაუდგინდა, თქვენ შეძლებთ ისარგებლოთ სააგენტოს მიერ შერჩეული მარკეტინგული და კომუნიკაციების კომპანიის მომსახურებით და მიიღოთ 10 000 ლარამდე თანადაფინანსება.

მონაწილეობის კრიტერიუმები დაინტერესებულ მეწარმეთათვის

• რეგისტრირებულია გადასახადის გადამხდელად, ხელშეკრულების გაფორმებამდე ერთი კალენდარული წლით ადრე.
• რეგისტრირებულია რეგიონული საკონსულტაციო ცენტრის წევრად.
• ბიზნესის მიღებული შემოსავალი, სააგენტოსთან ხელშეკრულების გაფორმებამდე წინა 12 თვის განმავლობაში არის ან აღემატება 30 000 ლარს.
• არ არის სახელმწიფოსა და მუნიციპალიტეტის, აგრეთვე სს„საპარტნიორო ფონდის“ მიერ პირდაპირი ან არაპირდაპირი წილობრივი მონაწილეობით შექმნილი იურიდიული პირი.
• არ არის ბუღალტრული აღრიცხვის, ანგარიშგებისა და აუდიტის შესახებ“ საქართველოს კანონის შესაბამისად I ან II კატეგორიის საწარმოს მიერ წილობრივი მონაწილეობით შექმნილი იურიდიული პირი.
• არ აქვს სახელმწიფოს მიმართ საგადასახადო დავალიანება (გარდა იმ შემთხვევისა, თუ საგადასახადო დავალიანების გადახდევინება გადავადებულია ან მისი გადახდის ვალდებულება შეჩერებულიაკანონის საფუძველზე).
• არ არის რეგისტრირებული მოვალეთა რეესტრში.
• საქმიანობა არ შედის შეზღუდული საქმიანობების ჩამონათვალში ( იხ. ბრძანების დანართი)

მომსახურებით სარგებლობის ეტაპები

• მომსახურებით სარგებლობის მსურველი მეწარმე საკუთარი პირადი სივრციდან ან ადგილზე ვიზიტით მიმართავს თავისივე რეგიონის საკონსულტაციო ცენტრს.
• მეწარმე რეგისტრირდება ცენტრის ონლაინ ქსელში და ქმნის პირად სივრცეს.
• მეწარმე ცენტრში ან თავის ონლაინ პირად სივრცეში წარმოადგენ სშესაბამის დოკუმენტაციას, რაც ამტკიცებს მის შესაბამისობას მოცემულ კრიტერიუმებთან.
• მეწარმე ცენტრის თანამშრომელთან ერთად გადის ბიზნეს დიაგნოსტიკას.
• დიაგნოსტიკის შედეგები განიხილება 30 კალენდარული დღის ვადაში და დგინდება მეწარმე სუბიექტის საჭიროებების შესაბამისი მომსახურებ(ებ)ის ჩამონათვალი.
• თუ ჩამონათვალი მოიცავს რეკომენდაციას საკონსულტაციო მომსახურების მიღებასთან დაკავშირებთ, მეწარმე სუბიექტი, სააგენტოს პარტნიორი ორგანიზაციების მომსახურებებიდან ირჩევს მისთვის სასურველ მომსახურებას.
• არჩეულ საკონსულტაციო კომპანიას, სააგენტოს "აწარმოე საქართველოში" და მეწარმეს შორის ფორმდება სამმხრივი ხელშეკრულება, სადაც ზუსტდება თანამშრომლობის სხვა დეტალები.

✅ გაცნობებთ, რომ სსიპ „აწარმოე საქართველოში“ საკონსულტაციო ცენტრების სერვისებით სარგებლობა უკვე მთელი საქართველოს მასშტაბით არის შესაძლებელი, მათ შორის თბილისშიც. 12 აგვისტოდან, საქართველოს ყველა რეგიონში ფუნქციონირებს პარტნიორი საკონსულტაციო ცენტრები, სადაც მეწარმეს შეუძლია გაიაროს ბიზნეს დიაგნოსტიკა და ჩაერთოს საკონსულტაციო სერვისების თანადაფინანსების პროგრამაში.

✅ როგორც მოგეხსენებათ „აწარმოე საქართველოში“ საკონსულტაციო ცენტრებში (აჭარა, სამეგრელო-ზემო სვანეთი და კახეთი) დიაგნოსტიკაზე ჩაწერა ხდება ცენტრებში ადგილზე ვიზიტის გზით. პროცედურა განსხვავებულია საქართველოს სხვა რეგიონებში არსებული მეწარმეებისთვის. პარტნიორ საკონსულტაციო ცენტრებში ბიზნეს დიაგნოსტიკის გავლის მიზნით მეწარმე ჯერ უნდა დაუკავშირდეს სააგენტოს „აწარმოე საქართველოში“ ცხელ ხაზს: 15 25 და შემდეგ მოხდება მისივიზიტის შესაბამის ცენტრში დაჯავშნა.

ჰორიზონტი ევროპა კვლევისა და ინოვაციების დარგში ევროკავშირის ძირითადი დაფინანსების პროგრამაა, რომლის ბიუჯეტი 95,5 მილიარდი ევროა. აღნიშნული თანხა, შვიდი წლის განმავლობაში (2021-2027) გრანტების სახით გაიცემა. პროგრამა მხარს უჭერს ევროკავშირის პოლიტიკის შექმნასა და განხორცილებას კვლევებისა და ინოვაციების სფეროში, ქვეყნებს შორის თანამშრომლობის გაღრმავების, ახალი ცოდნისა და ტექნოლოგიების შექმნისა და გავრცელების გზით .

„ჰორიზონტი ევროპას“ სხვადასხვა საგრანტო სქემების ფარგლებში დაფინანსების მოპოვება შეუძლიათ როგორც კვლევით დაწესებულებებს (მათ შორის უსდ-ებს), აგრეთვე მცირე და საშუალო მეწარმეებს, რომელთაც აქვთ ინოვაციური იდეა და საერთაშორისო თანამშრომლობის ფარგლებში სურთ მათი დანერგვა/განვითარება.

პროგრამის შესახებ დამატებით ინფორმაცია შეგიძლიათ იხილოთ პროგრამის ოფიციალურ გვერდზე: https://research-and-innovation.ec.europa.eu/funding/funding-opportunities/funding-programmes-and-open-calls/horizon-europe_en

პროგრამისა და მასში მონაწილეობის შესახებ ყველაზე ამომწურავ და ზუსტ ინფორმაციას მოგცემთ მისი “სამუშაო პროგრამები”. დოკუმენტების სანახავად დაფინანსებისა და ტენდერების პორტალის ვებგვერდის ზედა ველზე უნდა დააჭიროთ “How to Participate” და შემდგომ “Reference Documents”. დაფინანსებისა და ტენდერების პორტალის მარცხენა ზოლში - სანავიგაციო პანელზე, პროგრამირების პერიოდის გრაფაში მიუთითეთ: 2021-2027. პროგრამის არჩევის ფილტრის გრაფაში ჩასვით: Horizon Europe (HORIZON). იხილეთ სამუშაო პროგრამების სრულია სია შემდეგ ბმულზე.

პროგრამაში ქართველი მეცნიერებისა და ინოვატორების მონაწილეობის ხელშეწყობისთვის საქართველოს განათლების, მეცნიერებისა და ახალგაზრდობის სამინისტროს ბაზაზე დაარსებულია “ჰორიზონტი ევროპა” საქართველოს ეროვნული ოფისი, რომლის მთავარი მისიაა ევროკავშირის კვლევისა და ინოვაციის ჩარჩო პროგრამაში "ჰორიზონტი ევროპა" საქართველოს ჩართულობის გაძლიერება და ევროპულ კონსორციუმებში ქართველ აპლიკანტთა მონაწილობის გაზრდა.

ოფისი და მისი ეროვნული საკონტაქტო პირების ქსელი, რომელიც ფარავს პროგრამის ყველა მიმართულებას, ყველა დაინტერესებულ პირს სთავაზობენ შემდეგ მომსახურებას:

• თემატური საინფორმაციო ღონისძიებები და ტრენინგები
• კონსულტაციები დაინტერესებულ აპლიკანტებთან
• ტექნიკური დახმარება პროექტის მომზადების სხვადასხვა ეტაპზე
• დახმარება პარტნიორის მოძიებაში როგორც ლოკალურად, ისე საერთაშორისო დონეზე
• განაცხადის ‘სკრინინგის’ სერვისი მის წარდგენამდე, უცხოელი ექსპერტების მიერ
• სამგზავრო გრანტები ‘საბროკერო ღონისძიებებზე’ პარტნიორების მოძიების მიზნით
• სხვა მხარდაჭერის ზომები.

აღნიშნული სერვისების მიღება დაინტერესებულ მხარეთათვის არის უფასო.

• მეტი ინფორმაციისთვის, დეტალებს ეროვნული ოფისის საქმიანობის შესახებ ეწვიეთ ოფიციალურ გვერდს: ჰორიზონტი ევროპა
• მიმდინარე კონკურსებსა და სიახლეებს თვალი ადევნეთ ფეისბუქ გვერდზე: https://www.facebook.com/HorizonEuropeGeorgia
• ეროვნული ოფისის მიერ ორგანიზებული საინფორმაციო დღეების ხოლო ჩანაწერები იუთუბ არხზე - https://bit.ly/3Phq4VK
• ევროკომისიის მიერ გამართული საინფორმაციო დღეები - ვებგვერდი.
• ჰორიზონტის ევროპის დეშბორდი - ჰორიზონტი ევროპის ფარგლებში გამარჯვებული პროექტების შესახებ დეტალური ინფორმაცია

პროგრამით დაინტერესების შემთხვევაში, გთხოვთ იხელმძღვანელოთ მხოლოდ ოფიციალური დოკუმენტებით ევროკომისისა და ეროვნული ოფისის ვებსაიტიდან და მხოლოდ ოფიციალური კომუნიკაციის საფუძველზე.

ეროვნული ოფისის სერვისის მისაღებად გთხოვთ დაგვიკავშირდეთ:

• ელ.ფოსტა: [email protected]

ჰორიზონტი ევროპას ეროვნული ოფისი არის ერთადერთი წარმომადგენლობა საქართველოში. ეროვნული ოფისი ოპერირებს მოთხოვნის საფუძველზე, ოფისის წარმომადგენელი ან ეროვნული საკონტაქტო პირი თავად არ დაგიკავშირდებათ მხარდაჭერის შეთავაზებისათვის. ინფორმაციის გაზიარება ხდება მხოლოდ ევროკომისიისა და ოფისის ვებსაიტებსა და სოც.მედიაში ოფიციალურ გვერდზე.